ព័ត៌មានសេដ្ឋកិច្ច ក្នុងនិងក្រៅប្រទេស

home latest
អតិរេកពាណិជ្ជកម្មពិភពលោករបស់ចិនធ្លាក់ចុះជាង ១៦ភាគរយ

ក្រុងប៉េកាំង៖ យោងតាមទិន្នន័យរបស់រដ្ឋបាលគយចិន ពាណិជ្ជកម្មសរុបបានកើនឡើងដល់ ៤,៦២ពាន់ពាន់លានដុល្លារ នៅឆ្នាំ២០១៨ ដែលកើន ១២,៦ភាគរយធៀបនឹងឆ្នាំ២០១៧។ ប៉ុន្តែអតិរេកពាណិជ្ជកម្មរបស់ប្រទេសនេះបានធ្លាក់ចុះ ១៦,២ភាគរយមកនៅត្រឹម ៣៥១,៧៦ពាន់លានដុល្លារ ដោយសារតែការនាំចូលបានកើនឡើង ១៥,៨ភាគរយ ខណៈដែលការនាំចេញបានកើនឡើងត្រឹមតែ ៩,៩ភាគរយ។

ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃអង្គារ ទី១៥ ខែមករា ឆ្នាំ ២០១៩


GDP របស់ថៃអាចលូតលាស់បានតែ ៣,៨% ប៉ុណ្ណោះ

ក្រុងបាងកក៖ មជ្ឈមណ្ឌលព័ត៌មានសេដ្ឋកិច្ច (EIC) របស់ធនាគារ Siam Commercial Bank បានកាត់បន្ថយការព្យាករលើផលិតផលក្នុងស្រុកសរុប (GDP) របស់ប្រទេសថៃមកស្មើនឹង ៣,៨% ប៉ុណ្ណោះ ខណៈដែលមានកំណើនភាពមិនប្រាកដប្រជាក្នុងស្រុក និងនៅបរទេស។ យោងតាមការចេញផ្សាយពីសារព័ត៌មានបាងកកប៉ុស្តិ៍កាលពីថ្ងៃទី៩ ខែមករា បានស្រង់សម្តីរបស់លោក Yunyong Thaicharoen ដែលជាប្រធានសេដ្ឋវិទូ បានលើកឡើងថា ការនាំចេញរបស់ប្រទេសថៃនឹងលូតលាស់បានទាបជាងមុនដែលស្មើតែ ៣,៤% ប៉ុណ្ណោះក្នុងឆ្នាំ២០១៩ ទាបជាងការព្យាករមុនដែលស្មើ ៧% ព្រោះតែការអន់ថយនៃការលូតលាស់ជុំវិញពិភពលោក និងជម្លោះពាណិជ្ជកម្មរវាងសហរដ្ឋអាមេរិក និងប្រទេសចិន។

ប្រភពៈ ព័ត៌មានរបស់កាសែតកោះសន្តិភាពចេញផ្សាយថ្ងៃសុក្រ ទី១១ ខែមករា ឆ្នាំ ២០១៩


ការព្យាករពីកំណើនសេដ្ឋកិច្ចរបស់ធនាគារពិភពលោក

ធនាគារពិភពលោកបានព្យាករថា សេដ្ឋកិច្ចពិភពលោកអាចកើនឡើង ២,៩% នៅឆ្នាំនេះ និង ២,៨% នៅឆ្នាំក្រោយ។ តំបន់អឺរ៉ូអាចសម្រេចបានកំណើនសេដ្ឋកិច្ច ១,៦% នៅឆ្នាំនេះ និង ១,៥% នៅឆ្នាំក្រោយ ខណៈដែលតំបន់អាស៊ីបូព៌ា និងប៉ាស៊ីហ្វិកអាចកើនឡើង ៦% ទាំងពីរឆ្នាំ។

ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃសុក្រ ទី១១ ខែមករា ឆ្នាំ ២០១៩


វាយនភណ្ឌបង់ក្លាដែសនៅមានឱកាសវិនិយោគច្រើន

ក្រុងដាក្កា៖ ប្រទេសបង់ក្លាដែសមានវិសាលភាពវិនិយោគប្រមាណ ៦ពាន់លានដុល្លារក្នុង​វិស័យវាយនភណ្ឌបឋម (PTS) របស់ខ្លួនសម្រាប់រយៈពេល ៥ឆ្នាំខាងមុខ ខណៈដែលតម្រូវការក្រណាត់ដែលផលិតក្នុងស្រុកបាននិងកំពុងកើនឡើងទាំងនៅទីផ្សារក្នុងស្រុក និងអន្តរជាតិ។ លោក Mohammad Ali Khokon ប្រធានសមាគមរោងចក្រវាយនភណ្ឌ​បង់ក្លាដែស (BTMA) បានថ្លែងថា រដ្ឋាភិបាលបង់ក្លាដែសគួរផ្គត់ផ្គង់ថាមពល និងដីឧស្សាហកម្មនៅក្នុងតម្លៃសមរម្យ ដើម្បីឱ្យរោងចក្រ​ផលិតអំបោះ និងរោងចក្រតម្បាញមានអារម្មណ៍ថា ទទួលបានការលើកទឹកចិត្តឱ្យវិនិយោគក្នុងវិស័យនេះ។ នាពេលបច្ចុប្បន្ន រោងចក្រអំបោះក្នុងស្រុកអាចផ្គត់ផ្គង់ ៨៥% នៃវត្ថុធាតុដើមទៅវិស័យសម្លៀកបំពាក់ក្រណាត់ចាក់សម្រាប់នាំចេញ ហើយ ៣៥% ទៅ ៤០% ទៅឱ្យវិស័យក្រណាត់ត្បាញ។

ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃចន្ទ ទី១៤ ខែមករា ឆ្នាំ ២០១៩


ការនាំចេញរថយន្តរបស់ថៃនឹងកើនក្នុងកម្រិតតិចតួច

ក្រុងបាងកក៖ ក្រុមហ៊ុន Kasikorn Research Center (K-Research) បានព្យាករថា ការនាំចេញរថយន្តរបស់ប្រទេសថៃក្នុងឆ្នាំ២០១៩ នឹងកើនត្រឹម ១ ទៅ ៤ភាគរយប៉ុណ្ណោះ គឺពី ១,១៥លានដល់ ១,១៨លានគ្រឿង ខណៈប្រទេសនេះប្រឈមនឹងកត្តាអវិជ្ជមានជាច្រើនពីតំបន់អឺរ៉ុប និងអាមេរិកខាងជើង។ របាយការណ៍ស្រាវជ្រាវពីក្រុមហ៊ុននេះបង្ហាញថា​ការនាំចេញទៅអឺរ៉ុបនឹងធ្លាក់ចុះប្រហែល ៤ភាគរយមកនៅត្រឹមពី ១១៨ ០០០ ទៅ ១២៣ ០០០គ្រឿងក្នុងឆ្នាំ២០១៩។ ក្រុមហ៊ុនរថយន្តជាច្រើនបានផ្លាស់ប្តូររោងចក្រផលិតទៅអឺរ៉ុប ឬបណ្តាប្រទេសនៅជុំវិញ។

ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃចន្ទ ទី៧ ខែមករា ឆ្នាំ ២០១៩


  • ឱនភាពថវិការបស់ថៃនឹងកើនឡើងដល់ ៤៥០ពាន់លានបាតជាថ្មីទៀត
  • សន្ទស្សន៍ផ្សារហ៊ុនធំៗនៅអាស៊ី
  • សេដ្ឋកិច្ចសិង្ហបុរីកើនទាបជាងការព្យាករ
  • ភ្ញៀវទេសចរទៅកាន់កូរ៉េខាងត្បូងកើនឡើង ២៣,៥% ក្នុងខែវិច្ឆិកា
  • ប្រាក់ចំណេញក្នុងវិស័យឧស្សាហកម្មរបស់ចិនកើនឡើង ១១,៨%
  • សេដ្ឋកិច្ចម៉ាឡេស៊ីនឹងលូតលាស់ចាប់ពីខែកុម្ភៈដល់ខែមេសា
  • ថៃអាចសម្រេចទិសដៅនាំចេញនៅឆ្នាំនេះ
  • សេដ្ឋកិច្ចឌីជីថល ចូលរួមចំណែកកាន់តែច្រើនដល់ ផ.ស.ស របស់ប្រទេសចិន
  • វិស័យលក់រាយនៅអង់គ្លេសកាត់បន្ថយការងារ ១៥០ពាន់នាក់ នៅឆ្នាំ២០១៨
  • កូរ៉េនឹងទទួលពលករបរទេស ៥៦ពាន់នាក់នៅឆ្នាំ២០១៩