ព័ត៌មានសេដ្ឋកិច្ច ក្នុងនិងក្រៅប្រទេស
home latest
កម្ពុជាផលិតស្ករអំពៅបាន ១២ម៉ឺនតោនរយៈពេល ៩ខែ
ភ្នំពេញ៖ ក្រុមហ៊ុនផលិតស្ករសធំចំនួន៣ នៅក្នុងប្រទេសកម្ពុជា បានផលិតស្ករអំពៅឆៅ (មិនទាន់កែច្នៃ) ដែលបានចម្រាញ់ក្នុងអំឡុង ៩ខែឆ្នាំនេះ មានចំនួន ១២០ ១២៦តោន។ នេះបើយោងតាមតួលេខដែលបានពីក្រសួងឧស្សាហកម្ម និងសិប្បកម្ម។
ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃអង្គារ ទី១៣ ខែវិច្ឆិកា ឆ្នាំ ២០១៨
កំណើនវិស័យសំណង់ថមថយ តែសក្តានុពលសម្រាប់ជំនាញនៃវិស័យនេះនៅតែមាន
ភ្នំពេញ៖ បើទោះជាទុនវិនិយោគក្នុងវិស័យសំណង់នៅរយៈពេល ៣ត្រីមាស ឆ្នាំ២០១៨នេះ ហាក់មានកំណើនថមថយបន្តិចក្តី ប៉ុន្តែបើមើលពីសក្តានុពល និងឱកាសវិនិយោគនៅតែមានភាពល្អប្រសើរដដែលធៀបនឹងប្រទេសជិតខាង ដែលធ្វើឱ្យតម្រូវការអ្នកជំនាញនៅក្នុងវិស័យនេះនៅតែមានសម្រាប់ការអភិវឌ្ឍ។ យោងតាមរបាយការណ៍ពីក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ក្នុងរយៈពេល ៣ ត្រីមាសកន្លងទៅនេះ កម្ពុជាទទួលបានទុនវិនិយោគសរុបជាង ៤៨០០លានដុល្លារអាមេរិក ដោយអាជ្ញាធរបានផ្តល់សិទ្ធិក្នុងការវិនិយោគចំនួនជាង ២៥០០គម្រោង ដែលមានក្រឡាផ្ទៃជាង ១០លានម៉ែត្រការ៉េ។ ក្នុងចំណោមគម្រោងទាំងនោះមាន ៣៣គម្រោង ជាការវិនិយោគរបស់ក្រុមហ៊ុនបរទេស ដែលមានតម្លៃជាទឹកប្រាក់ប្រមាណជាង ៤៨០លានដុល្លារអាមេរិក។ លោក ខន គង្គា អគ្គនាយកប្រតិបត្តិក្រុមហ៊ុនវាយតម្លៃ និងភ្នាក់ងារអចលនទ្រព្យ អ៊ីអរអេ (ERA) បានឱ្យដឹងថា បច្ចុប្បន្ននេះទីផ្សារអចលនទ្រព្យនៅក្នុងប្រទេសកម្ពុជា ត្រូវការធនធានជំនាញក្នុងវិស័យអចលនទ្រព្យរាប់ម៉ឺននាក់ ដើម្បីចូលរួមចំណែក្នុងការលក់ និងការប្រឹក្សាយោបល់ទៅអ្នកអភិវឌ្ឍន៍ក្នុង និងក្រៅប្រទេស ជាពិសេសអ្នកអភិវឌ្ឍន៍ដែលមកពីបណ្តាប្រទេសនានាជុំវិញសាកលលោក។
ប្រភពៈ ព័ត៌មានរបស់កាសែតកោះសន្តិភាពចេញផ្សាយថ្ងៃអង្គារ ទី១៣ ខែវិច្ឆិកា ឆ្នាំ ២០១៨
កំណើននៅក្នុងវិស័យសំណង់ជំរុញការផលិតស៊ីម៉ងត៍កើនឡើង
ភ្នំពេញ៖ ខណៈវិស័យសាងសង់នៅកម្ពុជាបន្តកើនឡើង វាបានជំរុញឱ្យការផលិតស៊ីម៉ងត៍ក្នុងស្រុកក៏កាន់តែមានទំហំច្រើន។ យោងតាមតួលេខក្រសួងឧស្សាហកម្មបានឱ្យដឹងថា ឧស្សាហកម្មផលិតស៊ីម៉ងត៍របស់កម្ពុជាសម្រេចបាន ៣,៦លានតោន រយៈពេល ៩ខែដំបូងនៅឆ្នាំនេះ ពីរោងចក្រដែលកំពុងប្រតិបត្តិការចំនួន ៤ ខណៈរោងចក្រស៊ីម៉ងត៍ ២ ផ្សេងកំពុងដំណើរការចង្វាក់ផលិតកម្មរបស់ពួកគេ។
ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃសុក្រ ទី៩ ខែវិច្ឆិកា ឆ្នាំ ២០១៨
១០ខែ អគ្គនាយកដ្ឋានពន្ធដារប្រមូលចំណូលពន្ធសម្រាប់ថវិកាជាតិបានជាង ១,៨៧ពាន់លានដុល្លារ កើន ១៨ភាគរយ
ភ្នំពេញ៖ នៅរយៈពេល ១០ខែ ឆ្នាំ២០១៨ នេះ អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ ប្រមូលចំណូលសម្រាប់ថវិកាជាតិបានចំនួន ៧ ៤៩៤,៨៥ ប៊ីលានរៀល ស្មើនឹងប្រមាណ ១ ៨៧៣,៧១លានដុល្លារអាមេរិក កើនឡើង ១៨,៨៣% បើធៀបនឹងរយៈពេលដូចគ្នាឆ្នាំ២០១៧។ នេះបើយោងតាមសេចក្តីប្រកាសព័ត៌មាន របស់អគ្គនាយកដ្ឋានពន្ធដារ ស្តីពីលទ្ធផលនៃកិច្ចប្រជុំប្រមូលចំណូលពន្ធប្រចាំខែតុលា ឆ្នាំ២០១៨ នៅថ្ងៃទី០៧ ខែវិច្ឆិកានេះ។
ប្រភពៈ ព័ត៌មានរបស់គេហទំព័រ Fresh News ចេញផ្សាយថ្ងៃពុធ ទី៧ ខែវិច្ឆិកា ឆ្នាំ ២០១៨
ចិនបានបោះលុយជិត ៦៩លានដុល្លារ សង់សណ្ឋាគារលំដាប់ផ្កាយ ៥ នៅព្រះសីហនុ
ភ្នំពេញ៖ ក្រុមហ៊ុនចិន LING XIU INT’L CO.,LTD គ្រោងនឹងសាងសង់សណ្ឋាគារលំដាប់ផ្កាយ៥ ក្រោមទុនវិនិយោគប្រមាណ ៦៨,៩៨ លានដុល្លារអាមេរិក នៅខេត្តព្រះសីហនុ ខណៈគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជាបានសម្រេចចេញវិញ្ញាបនបត្រចុះបញ្ជីជាស្ថាពរ។ គម្រោងសណ្ឋាគារនេះ មានចំនួន ៤១០បន្ទប់ ដែលមានទីតាំងវិនិយោគស្ថិតនៅភូមិ៦ សង្កាត់លេខ៤ ក្រុងព្រះសីហនុ ខេត្តព្រះស៊ីហនុ អាចបង្កើតការងារបាន ១៣៣កន្លែង។
ប្រភពៈ ព័ត៌មានរបស់គេហទំព័រ Business Cambodia ចេញផ្សាយថ្ងៃព្រហស្បតិ៍ ទី៨ ខែវិច្ឆិកា ឆ្នាំ ២០១៨