ព័ត៌មានសេដ្ឋកិច្ច ក្នុងនិងក្រៅប្រទេស
home latest
កប៉ាល់ ១២គ្រឿងដឹកវត្ថុធាតុដើមបម្រើឱ្យវិស័យកាត់ដេរនឹងមកដល់ចុងសប្តាហ៍នេះ
ភ្នំពេញ៖ យោងតាមសេចក្តីជូនដំណឹងដែលចេញផ្សាយដោយសមាគមរោងចក្រកាត់ដេរនៅកម្ពុជា (GMAC) នៅថ្ងៃទី១១ ខែមីនា ម្សិលមិញបានឱ្យដឹងថា «វត្ថុធាតុដើមធាតុសម្រាប់បម្រើឱ្យវិស័យកាត់ដេរបានដឹកមកដល់កំពង់ផែស្វយ័តក្រុងព្រះសីហនុបណ្តើរៗហើយកាលពីយប់ថ្ងៃទី៩ ខែមីនា ឆ្នាំ២០២០ តាមរយៈនាវាដឹកជញ្ជូនឈ្មោះ SITC Fujian ។ រហូតដល់ថ្ងៃអាទិត្យចុងសប្តាហ៍នេះរំពឹងថានឹងមានកប៉ាល់ចំនួន ១២គ្រឿងនឹងចូលចតនៅកំពង់ផែក្រុងព្រះសីហនុជាមួយនឹងវត្ថុធាតុដើមបន្ថែមទៀត។
ប្រភពៈ ព័ត៌មានរបស់កាសែតកោះសន្តិភាពចេញផ្សាយថ្ងៃព្រហស្បតិ៍ ទី១២ ខែមីនា ឆ្នាំ ២០២០
ក្រុមប្រឹក្សាអភិវឌ្ឍន៍កម្ពុជាអនុម័តគម្រោងវិនិយោគ ៤បន្ថែម
ភ្នំពេញ៖ សេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា (CDC) បានឲ្យដឹងថាគិតត្រឹមថ្ងៃទី១០ ខែកុម្ភៈ ឆ្នាំ២០២០ CDC បានអនុម័តគម្រោងចំនួន ៤ ដែលរួមមានគម្រោងបង្កើតរោងចក្រផលិតកេសកាតុងរបស់ក្រុមហ៊ុន Timberpack Carton Co., Ltd. ស្ថិតក្នុងស្រុកអង្គស្នួល ខេត្តកណ្តាលមានទុនវិនិយោគ ៣,៨លានដុល្លារ និងអាចបង្កើតការងារបានចំនួន ១៣៦កន្លែង។ គម្រោងបង្កើតរោងចក្រផលិតស្បែកជើងរបស់ក្រុមហ៊ុន Fortress International Co., Ltd នៅខណ្ឌដង្កោ រាជធានីភ្នំពេញ មានទុនវិនិយោគ ៥,៦ លានដុល្លារ និងអាចបង្កើតការងារបាន ១ ៩២៨ កន្លែង។ ចំណែកគម្រោង ២ ផ្សេងទៀតរួមមាន គម្រោងវិនិយោគលើរោងចក្រផលិតស្បែកជើងរបស់ក្រុមហ៊ុន Qi You Footwear (Cambodia) Co., Ltd មានទីតាំងនៅឃុំបែកចាន ស្រុកអង្គស្នួល ខេត្តកណ្តាល មានទុនវិនិយោគ ៥,៥លានដុល្លារ និងអាចបង្កើតការងារបាន ១ ៨៣៤ កន្លែង និងគម្រោងវិនិយោគលើរោងចក្រកាត់ដេរ និងចាក់សម្លៀកបំពាក់ កន្សែងបង់ក មួក ស្រោមដៃ ស្រោមជើង ភួយ បូ គ្រប់ប្រភេទ និងវាយនភណ្ឌបម្រើក្នុងផ្ទះ (Home Textiles) របស់ក្រុមហ៊ុន Texssel (Cambodia) Co., Ltd ដែលស្ថិតនៅស្រុកបរសេដ្ឋ ខេត្តកំពង់ស្ពឺមានតម្លៃ ២,៥ លានដុល្លារ និងអាចបង្កើតការងារបាន ១ ០៣៤ កន្លែង។
ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃពុធ ទី១១ ខែមីនា ឆ្នាំ ២០២០
ក្រសួងនឹងផ្តល់អាជ្ញាប័ណ្ណរុករករ៉ែឱ្យក្រុមហ៊ុន ២ទៀត
ភ្នំពេញ៖ ក្រុមហ៊ុន H.T Kuang Ye Cambodia Development Co., Ltd និង Cambodia K88 Industry Co.,Ltd ត្រូវបានជ្រើសរើសជាក្រុមហ៊ុនដែលមានលក្ខណសម្បត្តិគ្រប់គ្រាន់ និងមានសិទ្ធិអាទិភាព ដើម្បីបន្តអនុវត្តន៍នីតិវិធីក្នុងការទទួលបានអាជ្ញាប័ណ្ណស្វែងរកធនធានរ៉ែនៅកម្ពុជា។ ប៉ុន្តែក្រសួងតម្រូវឲ្យក្រុមហ៊ុនត្រូវដាក់ឯកសារពាក់ព័ន្ធមួយចំនួន។ ក្រសួងនឹងធ្វើការពិភាក្សាលម្អិតជាមួយក្រុមហ៊ុន បើក្រុមហ៊ុនទាំង២នេះមានលក្ខណសម្បត្តិគ្រប់គ្រាន់ គេនឹងទទួលបានអាជ្ញាប័ណ្ណពីក្រសួង។
ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃចន្ទ ទី៩ ខែមីនា ឆ្នាំ ២០២០
ក្រុមហ៊ុនរោងចក្រកាត់ដេរតៃវ៉ាន់ គ្រោងពង្រីកមកកម្ពុជា
ភ្នំពេញ៖ បើតាមទីភ្នាក់ងារព័ត៌មានជប៉ុន NNA ក្រុមហ៊ុនតៃវ៉ាន់ TST Group Holding Ltd គ្រោងពង្រីករោងចក្រកាត់ដេរនៅកម្ពុជា ដើម្បីគេចពីការបិទដំណើរការដោយសារកូវីដ ១៩ ដោយគ្រោងវិនិយោគក្នុងទំហំទឹកប្រាក់ ២០លានដុល្លារ ដើម្បីធ្វើពិពិធកម្មពាណិជ្ជកម្មរបស់ខ្លួន។ ស្របពេលចង្វាក់ផ្គត់ផ្គង់ត្រូវបានផ្អាកនៅចិនដោយសារការរីករាលដាលនៃវីរុសកូវីដ ១៩ ក្រុមហ៊ុនដែលមានមូលដ្ឋាននៅទីក្រុងហុងកុងនេះ តែងតែមានផែនការធ្វើពិពិធកម្ម និងបង្កើនពាណិជ្ជកម្មរបស់ខ្លួននៅក្រៅប្រទេស។
ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃសុក្រ ទី៦ ខែមីនា ឆ្នាំ ២០២០
ធនាគារ SME នឹងដាក់ឱ្យដំណើរការក្នុងពេលឆាប់ៗនេះ
ភ្នំពេញ៖ ធនគារ SME ដែលជាធនាគារគ្រប់គ្រងដោយរដ្ឋថ្មីមួយមានដើមទុនដំបូង ១០០ លានដុល្លារ នឹងអាចបើកដំណើរការឆាប់នេះៗ។ បច្ចុប្បន្នកំពុងរង់ចាំអាជ្ញាប័ណ្ណពីធនាគារជាតិនៃកម្ពុជា ធនាគារនេះមានគោលបំណងផ្តល់កម្ចីដល់សហគ្រិនខ្នាតតូច និងមធ្យមក្នុងស្រុកក្នុងអត្រាការប្រាក់ទាប។ នេះបើយោងតាមមន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ។
ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃសុក្រ ទី៦ ខែមីនា ឆ្នាំ ២០២០