ព័ត៌មានសេដ្ឋកិច្ច ក្នុងនិងក្រៅប្រទេស
home latest
កម្ពុជានាំចេញគ្រឿងអលង្ការ និងត្បូងក្នុងតម្លៃជាង $១,៣ពាន់លាន
ភ្នំពេញ៖ ចាប់ពីខែមករា ដល់ខែមិថុនា ឆ្នាំ២០២០ កម្ពុជាបាននាំចេញគ្រឿងអលង្ការ និងត្បូងមានតម្លៃទៅក្រៅប្រទេសក្នុងតម្លៃសរុប ១ ៣១៤លានដុល្លារ ស្មើនឹងទម្ងន់សរុប ៣៦ ៨០៣ គីឡូក្រាម ឬ ២៥ ៥៦៣គ្រឿង។ នេះបើតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា។
ប្រភពៈ ព័ត៌មានរបស់គេហទំព័រកាសែតភ្នំពេញប៉ុស្តិ៍ចេញផ្សាយថ្ងៃអង្គារ ទី២៥ ខែសីហា ឆ្នាំ២០២០
ក្រុមហ៊ុនចិនចំនួន ២ ចូលមកវិនិយោគនៅក្នុង PPSEZ
ភ្នំពេញ៖ ក្រុមហ៊ុនថ្មីចំនួន២ របស់ចិនបានសម្រេចវិនិយោគក្នុងតំបន់សេដ្ឋកិច្ចពិសេសភ្នំពេញ (PPSEZ) លើផ្នែកបច្ចេកវិទ្យា អេឡិចត្រូនិក ទោះបីជាពេលនេះជំងឺកូវី១៩ នៅតែបន្តរីករាលដាលក៏ដោយ។ SEIKAWA (Cambodia) Technology Co., Ltd គឺជាក្រុមហ៊ុនផលិតគ្រឿងបន្លាស់ប្លាស្ទីកសម្រាប់ឧបករណ៍អគ្គិសនី និងអេឡិចត្រូនិក មកពីប្រទេសចិន បានវិនិយោគលើចង្វាក់ផ្គត់ផ្គង់មួយសម្រាប់ក្រុមហ៊ុនបច្ចេកវិទ្យាជាន់ខ្ពស់ដ៏ល្បីរបស់ប្រទេសជប៉ុននៅក្នុងប្រទេសកម្ពុជា។ ចំណែក WCFO (Cambodia) Co., Ltd គឺជាក្រុមហ៊ុនចិនមួយផ្សេងទៀត ដែលកំពុងផលិតឧបករណ៍ហ្វាយប៊ឺអុបទិក និងនាំចេញទៅទិសដៅប្រទេសជប៉ុន និងអាមេរិក។
ប្រភពៈ ព័ត៌មានរបស់គេហទំព័រកាសែតភ្នំពេញប៉ុស្តិ៍ចេញផ្សាយថ្ងៃចន្ទ ទី២៤ ខែសីហា ឆ្នាំ២០២០
ពាណិជ្ជកម្មទ្វេភាគីកម្ពុជា និងថៃ កើន ២,២៧%
ភ្នំពេញ៖ តួលេខនាយកដ្ឋានពាណិជ្ជកម្មបរទេសរបស់ប្រទេសថៃ ដែលបានរាយការណ៍ដោយកាសែតបាងកកប៉ុស្តិ៍បានបង្ហាញថា ដោយសារតែការីករាលដាលជំងឺកូវីដ១៩ ពាណិជ្ជកម្មឆ្លងព្រំដែនរបស់ប្រទេសថៃជាមួយបណ្តាប្រទេសផ្សេងៗបានធ្លាក់ចុះ ៩,១៨ភាគរយ ធៀបនឹងរយៈពេលដូចគ្នាកាលពីឆ្នាំមុននៅឆមាសទី១ ដោយសារវិធានការបិទប្រទេស និងការថមថយសេដ្ឋកិច្ចរបស់បណ្តាប្រទេសជិតខាង។ ទោះជាយ៉ាងណា ពាណិជ្ជកម្មទ្វេភាគីរវាងថៃ និងកម្ពុជា បានកើនឡើងបន្តិច ២,២៧ភាគរយ ខណៈដែលពាណិជ្ជកម្មទ្វេភាគីរវាងប្រទេសថៃ និងម៉ាឡេស៊ី ធ្លាក់ចុះ ២៦,៨ភាគរយ ប្រទេសឡាវ ធ្លាក់ចុះ ៧,០៩ភាគរយ និងជាមួយប្រទេសមីយ៉ាន់ម៉ាធ្លាក់ ១៣,៧ភាគរយ។
ប្រភពៈ ព័ត៌មានរបស់គេហទំព័រកាសែតភ្នំពេញប៉ុស្តិ៍ចេញផ្សាយថ្ងៃចន្ទ ទី២៤ ខែសីហា ឆ្នាំ២០២០
ចំណូលពីពន្ធដារក្នុងរយៈពេល ៧ខែ ដើមឆ្នាំមានតម្លៃជិត ១ ៨៧៨លានដុល្លារ
ភ្នំពេញ៖ ការប្រមូលចំណូលពន្ធអាកររបស់អគ្គនាយកដ្ឋានពន្ធដាររយៈពេល ៧ខែ ដើមឆ្នាំ២០២០ សម្រេចបានប្រមាណ ១ ៨៧៧,៨៩លានដុល្លារ ស្មើនឹង ៦៥,៨៩ភាគរយនៃផែនការប្រចាំឆ្នាំ ហើយបើធៀបនឹងចំណូលពន្ធអាកររយៈពេលដូចគ្នាឆ្នាំមុនឃើញថាកើន ១៦៥,៤៦លានដុល្លារ ស្មើ ៩,៦០ភាគរយ។ កំណើននេះបានពីអាករលើតម្លៃបន្ថែមកើន ៣,១៧ភាគរយ និងពន្ធលើប្រាក់ចំណូលកើន ២២,៧១ភាគរយ។ ដោយឡែកសម្រាប់ខែកក្កដា អគ្គនាយកដ្ឋានពន្ធដារប្រមូលចំណូលបាន ១៩៤,១៣ លានដុល្លារ ថយចុះ ១៦,២២លានដុល្លារ ស្មើនឹង ៧,៧១ភាគរយ។
ប្រភពៈ ព័ត៌មានរបស់គេហទំព័រកាសែតភ្នំពេញប៉ុស្តិ៍ចេញផ្សាយថ្ងៃចន្ទ ទី២៤ ខែសីហា ឆ្នាំ២០២០
បុព្វលាភក្នុងវិស័យធានារ៉ាប់រងនៅកម្ពុជាកើនជាង ១២% ក្នុងឆមាសទី១ ឆ្នាំនេះ
ភ្នំពេញ៖ ទិន្នន័យបានឱ្យដឹងថា ក្នុងរយៈពេល ៦ខែដើមឆ្នាំ២០២០ វិស័យធានារ៉ាប់រងទទួលបានបុព្វលាភ (ប្រាក់ចំណូលសរុបពីការលក់ធានារ៉ាប់រង) សរុប ១៣៣,៥លានដុល្លារ កើនឡើង ១២,១ភាគរយ ពីចំនួន ១១៩,១លានដុល្លារ កាលពីឆ្នាំ២០១៩ ដោយបុព្វលាភធានារ៉ាប់រងទូទៅមានចំនួន ៥៧,៩លានដុល្លារ កើនឡើង ១៧,៥ភាគរយ បុព្វលាភធានារ៉ាប់រងអាយុជីវិតមាន ៧២,៨លានដុល្លារ កើន ៩,៧ភាគរយ និងបុព្វលាភធានារ៉ាប់រងខ្នាតតូចមាន ២,៨លានដុល្លារ ថយចុះ ១៧,៧ភាគរយ។
ប្រភពៈ ព័ត៌មានរបស់គេហទំព័រកាសែតភ្នំពេញប៉ុស្តិ៍ចេញផ្សាយថ្ងៃសុក្រ ទី១៤ ខែសីហា ឆ្នាំ២០២០