ព័ត៌មានសេដ្ឋកិច្ច ក្នុងនិងក្រៅប្រទេស

home latest
រោងចក្រអគ្គិសនីតម្លៃ $១,៣ពាន់លាន អាចសង់ក្នុងពេលឆាប់ៗ

ភ្នំពេញ៖ គម្រោងរោងចក្រផលិតថាមពលអគ្គិសនីដើរដោយធ្យូងថ្មតម្លៃជិត ១,៣ពាន់លាន​ដុល្លារ នៅក្នុងខេត្តព្រះសីហនុអាចនឹងចាប់ផ្តើមសាងសង់ក្នុងពេលឆាប់ៗ បន្ទាប់ពីការសិក្សាផលប៉ះពាល់បរិស្ថាន និងសង្គមរួចរាល់។ រោងចក្រអគ្គិសនីដែលមានកម្លាំង ៧០០មេហ្គោវ៉ាត់នេះ គឺជាការវិនិយោគរួមគ្នារវាងក្រុមហ៊ុន Cambodia International Investment Development Group (CIIDG) ជាមួយនឹងក្រុមហ៊ុន Huadian Sihanoukville Power Generation Co., Ltd។ គម្រោងនេះនឹងសាងសង់លើផ្ទៃដី ៥៤,៩ហិកតា ក្នុងស្រុកស្ទឹងហាវ ខេត្តព្រះសីហនុ ដោយគ្រោងនឹងបញ្ចប់ការសាងសង់នៅចុងឆ្នាំ២០២២។

ប្រភពៈ ព័ត៌មានរបស់គេហទំព័រកាសែតភ្នំពេញប៉ុស្តិ៍ចេញផ្សាយថ្ងៃពុធ ទី០១ ខែកក្កដា ឆ្នាំ២០២០


កម្ពុជានាំចូលម៉ូតូ រថយន្ត និងគ្រឿងបន្លាស់ធ្លាក់ចុះក្នុងរយៈពេល ៥ខែ ឆ្នាំនេះ

ភ្នំពេញ៖ ការផ្ទុះឡើងនៃជំងឺកូវីដ ១៩ បានធ្វើឱ្យចំនួនទឹកប្រាក់ពីការនាំចូលមធ្យោបាយធ្វើដំណើរ និងដឹកជញ្ជូន ព្រមទាំងគ្រឿងបន្លាស់មកកាន់ប្រទេសកម្ពុជា ក្នុងរយៈពេល ៥ខែ ដើមឆ្នាំ២០២០ នេះ មានការធ្លាក់ចុះ។ យោងតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា បង្ហាញថា ការនាំចូលម៉ូតូ រថយន្ត និងគ្រឿងបន្លាស់មានតម្លៃសរុប ៦០០,៩លានដុល្លារ ធ្លាក់ចុះ ១២៦,៤៥លានដុល្លារ ស្មើនឹង ១៧,៣៩ភាគរយ បើធៀបនឹងរយៈពេលដូចគ្នាកាលពីឆ្នាំ២០១៩ ដែលមានតម្លៃ ៧២៧,៣៥ លានដុល្លារ។

ប្រភពៈ ព័ត៌មានរបស់គេហទំព័រកាសែតភ្នំពេញប៉ុស្តិ៍ចេញផ្សាយថ្ងៃពុធ ទី០១ ខែកក្កដា ឆ្នាំ២០២០


ការនាំចេញអង្ករនៅក្នុងឆមាសទី១ មានកំណើនជាង ៤១%

ភ្នំពេញ៖ របាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ការនាំចេញអង្ករដែលបានឆ្លងកាត់ការត្រួតពិនិត្យភូតគាមអនាម័យក្នុងរយៈពេល ៦ខែ ដើមឆ្នាំ២០២០ មានចំនួនសរុប ៣៩៧ ៦៦០តោន កើនឡើង ៤១ភាគរយ ធៀបនឹងរយៈពេលដូចគ្នាកាលកាលពីឆ្នាំមុន ដែលមាន ២៨១ ៥៣៨តោន។ ក្នុងនោះការនាំទៅទីផ្សារសហភាព​អឺរ៉ុបបានកើនឡើង ៤៥,១៩ភាគរយ ប្រទេសចិន កើន ២៥,២០ភាគរយ តំបន់អាស៊ាន ៤៧,៦៩ភាគរយ និងទិសដៅផ្សេងៗទៀតកើន ៧៩,២៦ភាគរយ។

ប្រភពៈ ព័ត៌មានរបស់គេហទំព័រកាសែតភ្នំពេញប៉ុស្តិ៍ចេញផ្សាយថ្ងៃព្រហស្បតិ៍ ទី០២ ខែកក្កដា ឆ្នាំ២០២០


វិស័យដឹកជញ្ជូនកម្ពុជា មិនទាន់មានសម្ទុះខ្លាំងដូចមុន

ភ្នំពេញ៖ ការបិទព្រំដែន និងការធ្លាក់ចុះយ៉ាងគំហុកការបញ្ជាទិញផលិតផលវាយនភណ្ឌ និងកាត់ដេរពីកម្ពុជាដែលបណ្តាលមកពីជំងឺកូវីដ១៩ បានធ្វើឱ្យវិស័យដឹកជញ្ជូនត្រូវជាប់គាំងស្ទើរទាំងស្រុងនាពេលកន្លងមក។ លោក ស៊ិន ចន្ធី ប្រធានសមាគមនភ័ស្តុភារកម្មកម្ពុជា (CLA) បានឱ្យដឹងកាលពីថ្ងៃព្រហស្បតិ៍ថា ទោះបីការនាំចេញផលិតផលនៅក្នុងវិស័យ​កសិកម្ម (អង្ករ) នៅពេលនេះកំពុងមានកំណើនខ្ពស់ក៏ដោយ ប៉ុន្តែជារួមសកម្មភាពដឹកជញ្ជូនទំនិញនៅពេលនេះគឺបានកើនឡើងតិចតួចប៉ុណ្ណោះ បើធៀបនឹងក្នុងអំឡុងខែមីនា មេសា និងឧសភា ដោយក្នុងអំឡុងពេលនោះការដឹកជញ្ជូនទំនិញស្ទើរតែធ្លាក់អស់គ្មានតែម្តង។

ប្រភពៈ ព័ត៌មានរបស់គេហទំព័រកាសែតភ្នំពេញប៉ុស្តិ៍ចេញផ្សាយថ្ងៃសុក្រ ទី០៣ ខែកក្កដា ឆ្នាំ២០២០


ការសិក្សាពីគម្រោងវិនិយោគវារីអគ្គិសនីនៅក្នុងខេត្តកោះកុងសម្រេចបាន ៨០%

ភ្នំពេញ៖ ប្រទេសកម្ពុជានឹងទទួលបានគម្រោងវិនិយោគទំនប់វារីអគ្គិសនីថ្មីមួយទៀតមានទំហំ ១៥០មេហ្គាវ៉ាត់ ដែលជាកិច្ចខិតខំប្រឹងប្រែងរបស់រដ្ឋាភិបាលក្នុងការជំរុញការវិនិយោគ​លើវិស័យថាមពលអគ្គិសនី។ ការសិក្សាផលប៉ះពាល់បរិស្ថាន និងសង្គមលើគម្រោងនេះបានប្រហែល ៨០ភាគរយហើយ។ ទំនប់អគ្គិសនីនេះនឹងត្រូវកសាងឡើងដោយក្រុមហ៊ុន China National Heavy Machinery Corporation (CHMC) របស់ប្រទេសចិន ក្នុងតម្លៃវិនិយោគ ៣៨០លានដុល្លារ។ វារីអគ្គិសនីថ្មីនេះត្រូវរំពឹងថានឹងជួយបង្កើនការផ្គត់ផ្គង់ថាមពលអគ្គិសនីដល់ខេត្តកោះកុង និងបណ្តាលខេត្តនៅជាប់ខេត្តនេះផងដែរ។

ប្រភពៈ ព័ត៌មានរបស់គេហទំព័រកាសែតភ្នំពេញប៉ុស្តិ៍ចេញផ្សាយថ្ងៃអង្គារ ទី៣០ ខែមិថុនា ឆ្នាំ២០២០


  • កម្ពុជាគ្រោងនឹងបង្កើតមជ្ឈមណ្ឌលជាតិចុះបញ្ជីអ៊ីនធឹណិត (KHNIC)
  • កំណើនតម្រូវការអគ្គិសនីធ្លាក់មកនៅត្រឹម ២០%
  • ការនាំចេញរបស់ក្រុមហ៊ុនលីលី ចាប់ផ្តើមល្អឡើងវិញ
  • SANTANA AGRO គ្រោងនាំចេញស្វាយចន្ទីសរីរាង្គនៅចុងឆ្នាំនេះ
  • កម្ពុជានាំចេញកង់ ៥ខែឆ្នាំនេះ មានតម្លៃសរុបជិត ២០០លានដុល្លារ
  • ទំហំពាណិជ្ជកម្មទ្វេភាគីកម្ពុជា-ថៃ កើនឡើងជាង ១៨% រយៈពេល ៤ខែដើមឆ្នាំ២០២០
  • ទំហំពាណិជ្ជកម្មក្នុងរយៈពេល ៤ខែមានតម្លៃជាង $១១ពាន់លាន
  • ទំហំពាណិជ្ជកម្មទ្វេភាគីកម្ពុជា-វៀតណាម ធ្លាក់ជាង ៨%
  • ការនាំចេញអង្ករត្រូវព្យាករថានឹងសម្រេចបានជិត ១លានតោន
  • ការនាំចេញកសិផលកម្ពុជានឹងលើសពី ៥លានតោន