ព័ត៌មានសេដ្ឋកិច្ច ក្នុងនិងក្រៅប្រទេស

home latest
MESCO នឹងចាប់ផ្តើមចម្រាញ់រ៉ែមាសនៅកម្ពុជានាចុងឆ្នាំនេះ

ភ្នំពេញ៖ ក្រុមហ៊ុនរ៉ែមាសមានមូលដ្ឋាននៅប្រទេសឥណ្ឌា Mesco Gold ដែលទទួលបានសិទ្ធិធ្វើអាជីវកម្មរ៉ែមាសនៅកម្ពុជា រំពឹងថានឹងអាចធ្វើការចម្រាញ់រ៉ែមាសនៅកម្ពុជាជាលើកដំបូងនៅចុងឆ្នាំនេះ ខណៈក្រុមហ៊ុនកំពុងដំឡើងផលិតកម្មចម្រាញ់រ៉ែមាសនៅគម្រោងរ៉ែមាសភូមិស៊ីយ៉ារុង ក្នុងខេត្តរតនគិរី។ នេះបើយោងតាមការបញ្ជាក់របស់តំណាងក្រុមហ៊ុន Mesco ។

ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃព្រហស្បតិ៍ ទី២៤ ខែមករា ឆ្នាំ ២០១៩


ឆ្នាំ២០១៨ អាស៊ានស្វាគមន៍ទេសចរចិនជិត ២៨លាននាក់

ភ្នំពេញ៖ ពេញមួយឆ្នាំ២០១៨ កន្លងទៅនេះ ភ្ញៀវទេសចរចិនបានមកកាន់តំបន់អាស៊ានមានរហូតដល់ប្រមាណ ២៧ ៩៣០ ០០០នាក់ ដែលមានចំនួនច្រើនលើសលប់ បើធៀបនឹងទីផ្សារទេសចរណ៍សំខាន់ៗដែលមកកាន់តំបន់នេះ។ យោងតាមតារាងស្ថិតិភ្ញៀវទេសចរ​ចិនមកកាន់ប្រទេសជាសមាជិកអាស៊ានក្នុងឆ្នាំ២០១៨ ក្នុងនោះ ប្រទេសកម្ពុជាបានចំនួន​ប្រមាណ ១,៩លាននាក់ ថៃទទួលបាន ១១លាននាក់ ម៉ាឡេស៊ីទទួលបាន ២,៩លាននាក់ សិង្ហបុរីទទួលបាន ១,៥លាននាក់ វៀតណាមទទួលបាន ៥លាននាក់ ឥណ្ឌូនេស៊ីទទួលបាន ៣លាននាក់ ហ្វីលីពីនទទួលបាន ១លាននាក់ ឡាវទទួលបាន ៨សែននាក់ មីយ៉ានម៉ាទទួលបាន ៦សែននាក់ និងប្រទេសព្រុយណេទទួលបាន ២៨ម៉ឺននាក់។

ប្រភពៈ ព័ត៌មានរបស់កាសែតកោះសន្តិភាពចេញផ្សាយថ្ងៃអង្គារ ទី២២ ខែមករា ឆ្នាំ ២០១៩


ចិនបន្ថែមកូតានាំចូលអង្ករពីកម្ពុជា ១០ម៉ឺនតោនទៀត

ភ្នំពេញ៖ ៤ថ្ងៃបន្ទាប់ពីសហភាពអឺរ៉ុបបានសម្រេចយកពន្ធលើការនាំចូលអង្ករពីកម្ពុជា ដែលនឹងអាចធ្វើឱ្យបរិមាណនាំចេញរបស់កម្ពុជាធ្លាក់ចុះ ប្រទេសចិនបានយល់ព្រមបង្កើន​កូតានាំចូលអង្ករពីកម្ពុជាចំនួន ១០ម៉ឺនតោនបន្ថែមទៀតក្នុងមួយឆ្នាំ ដល់ចំនួនកូតាសរុប ៤០ម៉ឺនតោននៅឆ្នាំ២០១៩ ។ តាមរយៈកូតាថ្មីនេះ ប្រសិនបើកម្ពុជាអាចនាំចេញបានពេញលេញតាមបរិមាណដែលបានព្រមព្រៀងនោះមានន័យថា គ្រាន់តែទីផ្សារចិនមួយបានស្រូបយកអង្ករកម្ពុជារហូតដល់ទៅ ៦៣% នៃការនាំចេញសរុបរបស់កម្ពុជាកាលពីឆ្នាំ២០១៨។ កាលពីឆ្នាំមុនប្រទេសកម្ពុជាបាននាំចេញអង្ករសរុបជាង ៦២ម៉ឺនតោន។

ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃពុធ ទី២៣ ខែមករា ឆ្នាំ ២០១៩


ក្រុមហ៊ុនជីប ម៉ុង ប្រកាសឈានចូលអាជីវកម្មហិរញ្ញវត្ថុនៅកម្ពុជាជាផ្លូវការ

ភ្នំពេញ៖ ក្រុមហ៊ុនពហុផលិតផលកម្ពុជា ជីប ម៉ុង គ្រុប ប្រកាសកាលពីថ្ងៃចន្ទថា ក្រុមហ៊ុនបានពង្រីកអាជីវកម្មរបស់ខ្លួនជាផ្លូវការទៅវិស័យហិរញ្ញវត្ថុ ដោយប្រតិបត្តិការធនាគារពាណិជ្ជជីបម៉ុង ដែលជាក្រុមហ៊ុនបុត្រសម្ព័ន្ធទី១២ របស់ខ្លួន។ ធនាគារនេះទទួលបានអាជ្ញាប័ណ្ណពីធនាគារជាតិនៃកម្ពុជា (NBC) កាលពីខែឧសភា ឆ្នាំមុន និងបានចាប់ផ្តើម​បង្កើតក្រុមការងារតាំងពីពេលនោះ។ ធនាគារនេះនឹងចាប់ផ្តើមជាមួយនឹងផលិតផលហិរញ្ញវត្ថុធម្មតា​ជាមូលដ្ឋានមុនពេលផ្លាស់ប្តូរជាបណ្តើរៗទៅរកធនាគារឌីជីថលឈានមុខគេ។

ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃអង្គារ ទី២២ ខែមករា ឆ្នាំ ២០១៩


កម្ពុជានឹងឥណ្ឌូនេស៊ីនឹងជំរុញការហោះហើរត្រង់ឱ្យបានឆាប់

ភ្នំពេញ៖ កម្ពុជា និងឥណ្ឌូនេស៊ីបានសន្យាជាថ្មីម្តងទៀតក្នុងការជំរុញការតភ្ជាប់ជើងហោះហើរត្រង់រវាងប្រទេសទាំងពីរ អោយបានកាន់តែលឿន។ វិស័យឯកជនរំពឹងថា ការហោះហើរត្រង់រវាងប្រទេសទាំងពីរអាចនឹងចាប់ផ្តើមក្នុងឆ្នាំ២០១៩នេះ។ តួលេខបានពីក្រសួងទេសចរណ៍កម្ពុជាបានឱ្យដឹងថា ក្នុងឆ្នាំ២០១៨ កម្ពុជាទទួលបានភ្ញៀវទេសចរសរុបជាង ៦,២លាននាក់ ក្នុងនោះភ្ញៀវទេសចមកពីប្រទេសឥណ្ឌូនេស៊ីមានតែចំនួន ៥៥ ៧៥៣នាក់ប៉ុណ្ណោះ កើនឡើង ១១,៨% បើធៀបនឹងឆ្នាំ២០១៧។

ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃចន្ទ ទី២១ ខែមករា ឆ្នាំ ២០១៩


  • កម្ពុជាចាប់ផ្តើមនាំចេកអំបូងលឿងទៅកាន់ទីផ្សារប្រទេសចិន
  • ខេត្តតាកែវ និងកណ្តាល នឹងមានរោងចក្រថ្មីៗចំនួន ៤ ដែលអាចផ្តល់ការងារជាង ៦ពាន់កន្លែង
  • កម្ពុជាគ្រោងចំណាយ ៦,៧ពាន់លានដុល្លារក្នុងឆ្នាំ២០១៩ នេះ
  • ធនាគារ SME អាចដំណើរការនៅចុងឆ្នាំ២០១៩ នេះ
  • កម្ពុជាគ្រោងទាក់ទាញទេសចរចិន ៥លាននាក់នៅឆ្នាំ២០២៥
  • គ្រឹះស្ថានអង្គរនឹងបង្ហាញតួលេខលក់សំបុត្រភ្លាមៗ
  • ចំនួនអ្នកធ្វើដំណើរឆ្លងកាត់ព្រលានយន្តហោះទាំង៣ កើនលើស ១០លាននាក់
  • ការនាំចេញអង្កររបស់កម្ពុជានៅតែបន្តធ្លាក់ចុះ
  • ទុនវិនិយោគផ្នែកសំណង់លំនៅឋានក្នុងឆ្នាំ២០១៨ ថយចុះ
  • ការនាំចេញរបស់តំបន់សេដ្ឋកិច្ចពិសេសក្រុងព្រះសីហនុកើនជិត ៧០%