ព័ត៌មានសេដ្ឋកិច្ច ក្នុងនិងក្រៅប្រទេស
home latest
ក្នុង១ខែ កំណើនយានយន្តទូទាំងប្រទេសមានជិត ៤ម៉ឺនគ្រឿង
ភ្នំពេញ៖ យោងតាមរបាយការណ៍របស់ក្រសួងសាធារណការ និងដឹកជញ្ជូន បានឱ្យដឹងថា នៅទូទាំងប្រទេស មធ្យោបាយយានយន្តបានបន្តកើនឡើងចន្លោះពីជិត ៤ម៉ឺនទៅជាង ៤ម៉ឺនគ្រឿង។ ជាក់ស្តែងនៅខែកញ្ញា ឆ្នាំ២០១៨ ចំនួនយានយន្តបានកើន ៤០ ៦៩៥គ្រឿង ក្នុងនោះម៉ូតូចំនួន ៣៤ ៥៣៧គ្រឿង រថយន្តធុនស្រាល និងធុនធ្ងន់ចំនួន ៦ ១៥៨គ្រឿង។ រីឯនៅខែតុលាឆ្នាំ២០១៨ វិញ បានកើនឡើងចំនួន ៣៩ ៦១២គ្រឿង ក្នុងនោះម៉ូតូចំនួន ៣៣ ៨៥០គ្រឿង រថយន្តធុនស្រាល និងធុនធ្ងន់ចំនួន ៥ ៧៦២គ្រឿង។
ប្រភពៈ ព័ត៌មានរបស់កាសែតកោះសន្តិភាពចេញផ្សាយថ្ងៃព្រហស្បតិ៍ ទី១៥ ខែវិច្ឆិកា ឆ្នាំ ២០១៨
រោងចក្រសម្អាតផ្លែឈើតម្លៃ $១០លាន នឹងដំណើរការនៅខែធ្នូ
ភ្នំពេញ៖ រោងចក្រលាងសម្អាត និងកម្ចាត់មេរោគលើផ្លែឈើស្រស់តម្លៃ ១០លានដុល្លារ នៅខេត្តកំពង់ស្ពឺ នឹងចាប់ផ្តើមដំណើរការនៅខែធ្នូខាងមុខនេះដែលនឹងផ្តល់អត្ថប្រយោជន៍ធំដល់កសិករ ពិសេសកសិករដាំស្វាយ។ រោងចក្រនេះវិនិយោគដោយ Hyundai Corporation Group របស់កូរ៉េខាងត្បូង ស្ថិតលើផ្ទៃដីទំហំ ៣ ហិកតា នៅស្រុកភ្នំស្រួច ខេត្តកំពង់ស្ពឺ។
ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃព្រហស្បតិ៍ ទី១៥ ខែវិច្ឆិកា ឆ្នាំ ២០១៨
ដំណាច់ត្រីមាសទី៣ ទុនវិនិយោគកម្ពុជាមានទឹកប្រាក់ជិត ៥ពាន់លានដុល្លារ
ភ្នំពេញ៖ យោងតាមទិន្នន័យពីក្រុមប្រឹក្សាអភិវឌ្ឍន៍កម្ពុជា (CDC) បានឱ្យដឹងកាលពីម្សិលមិញថា កម្ពុជាទទួលបានគម្រោងវិនិយោគសរុបចំនួន ១៧០ នៅក្នុងរយៈពេល ៩ខែដើមឆ្នាំ២០១៨នេះ ដែលគិតជាទឹកប្រាក់មានចំនួនជាង ៤,៧ពាន់លានដុល្លារ។ ក្នុងចំណោមគម្រោងវិនិយោគនោះ មានគម្រោងក្រៅតំបន់សេដ្ឋកិច្ចពិសេសចំនួន ១១៤ ដែលគិតជាទឹកប្រាក់ចំនួន ៤ពាន់លានដុល្លារ និងគម្រោងក្នុងតំបន់សេដ្ឋកិច្ចពិសេសមានចំនួន ៥៦គម្រោង ដែលគិតជាទឹកប្រាក់ចំនួនជិត ៧០០លានដុល្លារ។ គម្រោងនៃការវិនិយោគឆ្នាំនេះ មានការកើនឡើងចំនួន ២៨គម្រោង ធៀបរយៈពេលដូចគ្នាកាលពីឆ្នាំមុន។ គម្រោងវិនិយោគទាំងនេះបាននិងកំពុងបង្កើតការងារចំនួនជិត ៣៦ពាន់កន្លែងនៅកម្ពុជាផងដែរ។
ប្រភពៈ ព័ត៌មានរបស់កាសែតកោះសន្តិភាពចេញផ្សាយថ្ងៃព្រហស្បតិ៍ ទី១៥ ខែវិច្ឆិកា ឆ្នាំ ២០១៨
តម្លៃពោតក្នុងការប្រមូលផលលើកទី២នេះ កើនឡើងបន្តិច
ភ្នំពេញ៖ តម្លៃពោតក្រហមនៅខេត្តភាគខាងលិចប្រទេសកម្ពុជាក្នុងរដូវប្រមូលផលលើកទី២ ក្នុងឆ្នាំនេះបានកើនឡើង ១៣០រៀល ដល់ ៥៩០រៀល ក្នុងមួយគីឡូក្រាម បើធៀបនឹងតម្លៃក្នុងរដូវប្រមូលផលលើកទី១។ ដំណាំពោតក្រហមត្រូវបានដាំដុះ ២ដងក្នុងមួយឆ្នាំ ដោយការប្រមូលផលលើកទី១ ចាប់ពីចុងខែមិថុនា ដល់ខែសីហា និងលើកទី២ ចាប់ពីចុងខែតុលា ដល់ខែកុម្ភៈ។ នេះបើយោងតាមមន្ត្រីមន្ទីរពាណិជ្ជកម្មខេត្ត និងឈ្មួញ។
ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃពុធ ទី១៤ ខែវិច្ឆិកា ឆ្នាំ ២០១៨
ថៃបោះទុន ១០លានដុល្លារសង់ផ្សារទំនើប BIG C នៅក្រុងប៉ោយប៉ែត
ភ្នំពេញ៖ ក្រុមហ៊ុនដ៏ធំរបស់ថៃសម្រេចបោះទុនប្រមាណ ១០លានដុល្លារ ដើម្បីវិនិយោគសាង់សង់ផ្សារទំនើប Big C នៅក្រុងប៉ោយប៉ែត។ ផ្សារទំនើបនេះនឹងចាប់ផ្តើមសាងសង់នៅអំឡុងខែធ្នូខាងមុខ ហើយភាពយឺតយ៉ាវនៃការសាងសង់ ដោយសារក្រុមហ៊ុនមិនទាន់ទទួលបានអាជ្ញាប័ណ្ណពីរាជរដ្ឋាភិបាលកម្ពុជា។ ផ្សារទំនើបនេះនឹងសាងសង់លើផ្ទៃដី ២,៥ហិកតា ក្នុងនោះដីសម្រាប់សាងសង់ផ្សារមានទំហំ ១,៥ហិកតា និងដី ១ហិកតា ទៀតបម្រុងទុកសម្រាប់ចំណតយានយន្ត។
ប្រភពៈ ព័ត៌មានរបស់កាសែតកោះសន្តិភាពចេញផ្សាយថ្ងៃពុធ ទី១៤ ខែវិច្ឆិកា ឆ្នាំ ២០១៨