ឱកាសការងារចំនួន៣២៧ កន្លែងក្នុងមុខតំណែងផ្សេងៗគ្នាពីក្រុមហ៊ុនធំៗចំនួន៤នឹងត្រូវបានផ្តល់ជូន សម្រាប់យុវជនសិស្ស/និស្សិត និងអ្នកស្វែងរកការងារធ្វើទូទៅនៅក្នុងវេទិកាការងារប្រចាំខែរបស់ ទីភ្នាក់ងារជាតិមុខរបរនិងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២៥ ខែ មករា ឆ្នាំ២០១៨ ខាងមុខនេះ។

ក្រុមហ៊ុនទាំង៤ដែលចូលរួមក្នុងវេទិកាការងារនេះរួមមាន៖ ផ្សារទំនើប Aeon Mall, មីក្រូហិរញ្ញវត្ថុ​ជោគជ័យ, ក្រុមហ៊ុនឆ្នោតមហាសំណាង KPW និងភោជនីដ្ឋាន World Dinning Restaurant។ ក្រុមហ៊ុនទាំង៤នេះ នឹងមកធ្វើការសម្ភាសដោយផ្ទាល់ជាមួយនឹង​ យុវជនសិស្ស/និស្សិត និងអ្នកស្វែង​រកការងារចាប់ពីម៉ោង៨:០០ព្រឹក ដល់ម៉ោង៥ កន្លះល្ងាច។

លោក ប៉ុល សុវណ្ណរស្មី ប្រធានគ្រប់គ្រងធនធានមនុស្សផ្សារ ផ្សារទំនើបAEON MALL បានឲ្យដឹងថា​នេះជាលើកទី៥ហើយដែលលោកបានសហការជ្រើសរើសបុគ្គលិក តាមរយៈNEA។ សម្រាប់លើកនេះ ក្រុមហ៊ុននឹងសម្ភាសបេក្ខជនជាពីរដំណាក់កាល ទី១គឺសម្ភាសជំហានដំបូងគឺយកតែអ្នកជាប់លើកទី១​នៅ NEA ហើយលទ្ធផលសម្ភាសទី១នេះនឹងប្រកាសនៅNEA។  ចំពោះអ្នកដែលជាប់លើកទី១​នេះនឹងត្រូវទៅសម្ភាសលើកទី២ នៅក្រុមហ៊ុនផ្ទាល់តែម្តង។

លោក រស្មី បានបញ្ជាក់ថាបច្ចុប្បន្ន ក្រុមហ៊ុនមានបុគ្គលិក កំពុងបម្រើការងារចំនួន៧៨០នាក់។ ក្នុងចំណោមនោះក៏មានមួយចំនួនទទួលបានការងារតាមរយៈការជ្រើសចេញពីការសម្ភាសនៅNEAផងដែរ។ ជាមួយគ្នានោះលោកសង្កត់ធ្ងន់ថា បើសិស្ស/និស្សិត ដែលចង់ទទួលបានការងារនៅ AEON ត្រូវរៀបចំប្រវត្តិរូបសង្ខេបឲ្យបានត្រឹមត្រូវ, រៀបចំខ្លួនឲ្យបានល្អ, ស្វែងយល់អំពីមុខតំណែងដែលខ្លួន​ជ្រើសរើស និងត្រូវគោរពពេលវេលាជាដើម។

គួររំឭកថា ជារៀងរាល់ខែ NEA តែងរៀបចំវេទិកាការងារ និងសម្ភាសការងារ ដើម្បី​ជំរុញ​ឲ្យអ្នកស្វែង​រកការ​ងារ ​ទទួលបានឱកាស​ការងារ និងជ្រើសរើសបុគ្គលិក​ស្របតាមតម្រូវការរបស់ទីផ្សារការងារ។ គួរបញ្ជាក់ផងដែរថា ទីភ្នាក់ងារជាតិមុខរបរ និងការងារបានរៀបចំនូវវេទិកាការងារដូចគ្នានៅ​តាម​មជ្ឈមណ្ឌលការងារទាំង១១​របស់​ខ្លួនជិត ២០០​ដង​មកហើយតាំងពីឆ្នាំ២០០៩មក ដោយមាន​សិស្ស/និស្សិត និងអ្នកស្វែងរកការងារធ្វើសរុបចំនួនជិត​៣ម៉ឺននាក់បាន​ចូលរួម ហើយអ្នក​ស្វែងរក​ការងារធ្វើចំនួនជាង១០០០០ នាក់ បានទទួលការងារធ្វើរួច​ជាស្រេចតាមរយៈវេទិកា​ការងារទាំងនេះ។

វេទិកាការងារនេះ គឺជាផ្នែកមួយនៃយន្តការវេទិកាការងាររបស់រាជរដ្ឋាភិបាលក្នុងការផ្ដល់​ឱកាស​ដល់​សាធារណៈជន ជាពិសេសយុវជនដែលចង់ស្វែងការងារធ្វើឬអ្នកចង់ផ្លាស់ប្តូរការងារអាចទទួលបាន​ការងារកាន់​តែងាយ​ស្រួលចំណេញពេលវេលា និងនៅមួយកន្លែង។ វេទិកានេះបានរួម​ចំណែក​ជួយ​ពន្លឿនដំណើរការជ្រើស​រើសបុគ្គលិករបស់ដល់និយោជកឲ្យបានជួប និងសម្ភាសផ្ទាល់ជាមួយអ្ន​ក​កំពុងស្វែងរក​ការងារ​ធ្វើ។

ទីភ្នាក់ងារជាតិ មុខរបរនិងការងារ នៃក្រសួងការងារ និងបណ្តុះបណ្តាលវិជ្ជាជីវៈ តែងតែ​រៀបចំវេទិកា​ការងារបែបនេះរៀងរាល់សប្តាហ៍ទី៤នៃខែនីមួយៗ ចាប់ពីម៉ោង៨ព្រឹក ដល់ម៉ោង៥ ល្ងាច។ សម្រាប់​យុវជន សិស្ស/និស្សិត ដែលមានបំណងចង់ស្វែងរកការងារដែលខ្លួនពេញចិត្ត និងសមស្រប ទៅតាម​ជំនាញរៀងៗខ្លួន អាចមកចូលរួមដោយសេរីនៅក្នុងវេទិកាការងារនេះបានដែលនឹងប្រព្រឹត្តិ​ទៅនៅ​ក្នុងបរិវេណក្រសួងការងារ និងបណ្តុះបណ្តាលវិជ្ជាជីវៈ ដោយ​ភ្ជាប់មកជាមួយនូវប្រវត្តិរូបសង្ខេប (CV)។

សម្រាប់ព័ត៌មានបន្ថែមសូមទាក់ទងមជ្ឈមណ្ឌលការងាររាជធានីភ្នំពេញតាមរយៈលេខទូរស័ព្ទ ០១៦ ៧៨៦៦៥៥ ឬគេហទំព័រ​របស់​ទីភ្នាក់ងារជាតិ​មុខរបរ​ និងការងារwww.nea.gov.kh និងទំព័រ facebookneakhmer (អិនអ៊ីអេ ខ្មែរ)ដោយ​ងាយ​ស្រួល៕